प्रतिनिधी- DNA मराठी टीम
श्रीगोंदा :- आशिया खंडात नावाजलेल्या व सर्वात मोठ्या काष्टी विविध कार्यकारी सेवा सोसायटीची निवडणूक प्रक्रिया चालू असुन विविध आरोप प्रत्यारोप चालू आहेत. दोन दिवसांपूर्वी सेवा सोसायटीचे माजी अध्यक्ष कैलास पाचपुते यांनी आमदार बबनराव पाचपुते व खासदार सुजय विखे हे आमच्यासोबत असल्याचे वर्तमानपत्रातून सांगितले होते. यावर खासदार साहेबांनी आमदार पाचपुते यांच्याशी संवाद साधुन वृत्तपत्रातील बातमी विषयी सत्यता पडताळली. यानंतर भाजपा तालुकाध्यक्ष संदिप नागवडे यांनी खासदार सुजय विखे व आमदार बबनराव पाचपुते यांच्याशी चर्चा केली असता ही निव्वळ अफवा असून आम्ही दोघेही भाजपाचे जेष्ठ नेते भगवानराव पाचपुते यांच्या पाठीशी खंबीरपणे उभे असल्याचे कळवले,अशी माहिती भाजपा तालुकाध्यक्ष नागवडे यांनी प्रसिद्धीपत्रकाद्वारे दिली आहे.
जेष्ठ नेते भगवानराव पाचपुते यांनी काष्टी सेवा सोसायटीचा कारभार अतिशय पारदर्शी पणे करून सेवा सोसायटीचे नाव आशिया खंडात अग्रस्थानी आणण्याचे काम केले. आमदार पाचपुते यांच्या मार्गदर्शनाखाली त्यांनी सेवा सोसायटी मध्ये अनेक विभाग चालू करून सभासद हित जोपासण्याचा प्रामाणिकपणे प्रयत्न केलेला आहे. त्यांच्या कार्यकाळात सेवा सोसायटीस अनेक राज्यस्तरीय व देशपातळीवरील पुरस्कार मिळाले आहेत. आजही भगवानराव पाचपुते हे विविध प्रकारच्या नवनवीन कल्पनांमधून सोसायटीचे नाव मोठे करण्याचा व त्या माध्यमांतून स्थानिक तरुणांना रोजगार मिळवून देण्यासाठी प्रयत्नशील आहेत. तसेच शेतकऱ्यांसाठी खते व औषधे उपलब्ध करून देण्याचे काम त्यांनी या माध्यमातुन केले आहे. जेष्ठ नेते भगवानराव पाचपुते यांच्यावरील विश्वासामुळे सभासद आजपर्यंत त्यांच्या पाठीशी खंबीरपणे उभे आहेत व भविष्यात हि राहतील यात कुठलीही शंका नसल्याचा आशावाद संदिप नागवडे यांनी व्यक्त केला.
सहकारात काम करणाऱ्या काही अपप्रवृत्ती काष्टी सोसायटी निवडणुकीत हस्तक्षेप करत आहेत, त्यांनी अगोदर स्वतःच्या गावातील सेवा संस्थेमध्ये काय विकास केला, सभासदांचे काय हित जोपासले हे सांगावे व मग काष्टी सोसायटीशी तुलना केल्यास आपण कुठे आहोत हे आधी त्यांनी तपासावे व नंतर दुसरीकडे ढवळाढवळ करावी असा उपरोधिक टोला कोणाचेही नाव न घेता संदिप नागवडे यांनी लगावला आहे.
