‘त्या’ प्रकरणानंतर किरीट सोमय्या अंडरग्राऊंड; संजय राऊत यांचा मोठा दावा

माझ्या माहितीनुसार, किरीट सोमय्या हे फरार झाले आहेत. ते अटकपूर्व जामिनासाठी न्यायालयातही गेले आहेत. ‘कर नाही त्याला डर कशाला’, असे भाजपचे नेते महाविकास आघाडीच्या नेत्यांना ऐकून दाखवतात. मग किरीट सोमय्या यांनीही जाऊन पोलिसांना उत्तर द्यावीत. तुम्ही एरवी इतरांना जाब विचारता मग आता तुम्हीही उत्तर द्या, असे संजय राऊत यांनी म्हटले. आयएनएस विक्रांत आर्थिक अपहार प्रकरणात माझ्याकडे जितकी माहिती होती, ती पोलिसांना दिली आहे. आता मी या प्रकरणात हस्तक्षेप करणार नाही, असेही संजय राऊत यांनी सांगितले.

गुणरत्न सदावर्तेंना भाजपची आर्थिक रसद

गुणरत्न सदावर्ते यांना भाजपकडून आर्थिक रसद पुरवली जात असल्याचा आरोप संजय राऊत यांनी केला. शरद पवार आणि उद्धव ठाकरे यांच्यावर गरळ ओकण्यासाठीच भाजप सदावर्ते यांना पैसे देते, असे राऊत यांनी म्हटले. तसेच राऊतांनी सध्या मुंबईत ठाण मांडून बसलेल्या एसटी आंदोलकांबाबतही शंका उपस्थित केली. एसटी कर्मचाऱ्यांना आझाद मैदानातून हटवल्यानंतर ते छत्रपती शिवाजी महाराज टर्मिनसवर (सीएसएमटी) जाऊन बसले. या सर्व आंदोलकांकडे एकाचवेळी प्लॅटफॉर्म तिकीटं कशी आली? त्यांना कोणती यंत्रणा पोसत आहे, मदत करत आहे?, असा सवाल संजय राऊत यांनी उपस्थित केला. आमचा कामगारांना पाठिंबा आहे. पण कामगारांच्या एका गटाला भडकावून महाविकास आघाडी सरकार आणि महाराष्ट्राविरुद्ध गरळ ओकण्याचे काम सुरु आहे. याच्यामुळे विरोधी पक्षाला आपण फार मोठी तिरंदाजी करत आहोत, असे वाटत असल्याची टीका संजय राऊत यांनी केली.