मुंबई –  मागच्या काही दिवसांपासून राज्यातील अनेक भागात वीज संकट सुरु आहे. अनेक भागात अघोषित लोडशेडिंग (Load shedding)सुरु असल्याने नागरिकांचे हाल होत आहे. मात्र आता येन उन्हाळ्यात पुन्हा राज्यातील नागरिकांच्या अडचणीत वाढ होणार आहे. महावितरणने (MSEDCL)मोठी घोषणा करत राज्यात आज पासून लोडशेडिंगची घोषणा केली आहे. कोळसा टंचाईमुळे महानिर्मितीचे घटलेले उत्पादन आणि बाहेरून खरेदी करावी लागणारी महागडी वीज, यामुळे राज्यातील काही भागात लोडशेडिंग जाहीर करण्यात आली आहे. आज पासून मुंबई, ठाणे, नवीमुंबई वगळता राज्यातील इतर जिल्ह्यांना लोडशेडिंगचा फटका बसणार आहे.(Announcement of load shedding in the state; Crisis of load shedding in ‘this’ district from today)

ज्या ठिकाणी वीजचोरी, वीज वितरण हानी आणि बिलाची वसुली कमी आहे अशा ठिकाणी आम्ही लोडशेडिंग करू.   विदर्भ, मराठवाडा, खान्देश जिल्ह्यातील नागरिकांना लोडशेडिंगचा फटका बसणार आहे. काही शहरी भागात जरी आम्ही भारनियमन करत असू तरी दोन तासांपर्यंत मर्यादित ठेवू, असंही महावितरणच्या अधिकाऱ्यांनी नमूद केलं आहे.

दरम्यान, राज्यात ऊन तापत असल्याने घरगुती वीज वापरासह औद्योगिक व कृषिपंपाचा वीजवापरदेखील वाढला आहे. त्यामुळे विजेची मागणी विक्रमी २८ हजार मेगावॉटच्या घरात गेली आहे.  पंधरा दिवसांपासून ‘महावितरण’कडील विजेची मागणी सातत्याने २४ हजार ५०० ते २४ हजार ८०० मेगावॉट दरम्यान आहे. विजेच्या मागणीचा चढता आलेख लक्षात घेता ही मागणी लवकरच २५ हजार ५०० मेगावॉटवर जाण्याची शक्यता आहे. त्याच वेळी रात्रीच्या कालावधीतदेखील मागणी २२ हजार ५०० ते २३ हजार मेगावॉट आहे, असे ‘महावितरण’ने म्हटले आहे.

वीजबचतीचे आवाहन

‘महावितरण’ला सध्या २५०० ते ३००० मेगावॉट विजेच्या तुटीला सामोरे जावे लागत आहे. महाराष्ट्र विद्युत नियामक आयोगाने मंजुरी दिलेल्या निकषांप्रमाणे शहरी व ग्रामीण भागातील काही वीजवाहिन्यांवर आगामी काळात नाईलाजास्तव अधिकचे भारनियमन करावे लागू शकते. हे टाळण्यासाठी वीजग्राहकांनी सहकार्य करावे आणि विजेचा वापर अतिशय काटकसरीने करावा, असे आवाहन ‘महावितरण’कडून करण्यात आले आहे.(Announcement of load shedding in the state; Crisis of load shedding in ‘this’ district from today)